( 1 )
من تجين ..
ما أدري وش إللي يقلب الدنيا ..
ويْـخَليها تزين !!
وش يجعل الأشيا كثير أجمل ..
وش يجعلك فوق العروش الأولّه ..
في مملكات الفاتنين !؟
أحس ما كني بشر ..
في شوفتك .. أتحول نجوم وقمر .
وأضوي لك الظلما شِعر ..
وأغردك مثل الوتر ..
وأقول للفرقا دخيلك ..
لو سمحتي .. لا تجين .
( 2 )
من تـِجين ..
أعطرك عطرين ..
عطر أشواقنا .. وعطر الحنين ..
وأغيب في طيب اللقا والملتقى والياسمين .
أشرب من النشوه حياه ..
وأسقى تفاصيل الحياه ..
وأحياك يا كل الحياه ..
في ساعتين .
يا إنتي: تري ما كنت أنا قبلك ، ولا بعدك بكون ….
يا أول أطوار العقل ..
يا آخر أطوار الجنون .
يا إختصار العشق ..
والعشقات .. وإللي يعشقون .
لبيك لبيك وتراك إللي ..
على كلي تمون .
وشلون لا …
وإنتِ النظر وإنتِ البحر وإنتِ السَمَر وإنتِ الفتون .
( 3 )
من تـِجين ..
أقول يا سبحان من سَواك رب العالمين ..
يا أروع إحساسٍ تجاوز فلسفات المبدعين .
شلال من فتنه ونور .
سحر يذل الحور ويهد الغرور ..
وروزٍ ثقيل وحوله العالم تدور ..
يا درة الدُّر .. ونشيد الـحُّر ..
يا بدر البدور .
يا لين طبعك لو قسى ..
ويا عدل قلبك لو يجور
إنتي أبد ..
ما تشبهين أحد أبد ..
ولو كان زين بك تشبه ..
أو تقرب وإجتهد .
مالك مثيل ..
إلا المحال المستحيل المستحيل
جل الذي جلاّ جمالك ..
أشهد إنه أكثر أكثر من جميل .
( 4 )
من تـِجين ..
يلفني صمت الخشوع …
وأفنى مثل ضي الشموع ..
وأستلهم أبعاد الغموض ..
أخوض في جوف القوافي والعروض ..!
أسيِّس جفال الحكي ..
وأغيِّض المعنى الغَيوض .
وأصير شاعر في دجى الكلمة ينوض
أترجم أشكال الدلال …
أفسر إشكال السؤال …
وأعيش ما بين الحقيقه … نصفها وبين الخيال .
رحّال ما بينك وبينك ..
أسِجْ من عينك لعينك ..
وأصير مرسول الملا .
وسفيرهم ما بين إيدينك .
( 5 )
من تِجين ..
أقطع خطوط الذاكره ـ وأشطب على باكر ..
وأكون في شرع الغرام الناسي الذاكر
إذا شطحت أستجمعك ..
وإذا تعديت أرجعك .
الله يالله يا لله ما أروعك ..
ملاك لكنك بشر
بشر ولكنك ملاك ..
عندك تعلمت الحذّر
ولجلِك تعشَقت الهلاك .
أنا بَلاي إنك بلاي
وإنتي بلاكِ إني بلاك ..
دنياكِ ما تنفع بلاي
ودنياي ما تنفع بلاكِ .
( 6 )
من تـِجين ..
أنسى اللغات وخارطات الكون كله ..
والخواطر من سفرها تعود لكن مسفهله ..
أتنثر لك دروب …
وأشرق بليّا غروب …
وأحلف إني عن هواكِ إللي ذبحني ما أتوب .
كيف يمضي الوقت ما أدري ..!!
كيف يجري ..؟
كيف وأنا في وجودك ..
أحلم وبإسمك أهَذْري ..
آه يا أتلا مدى ،وأبعد مدى ، وأطول مدى
كل نبض إن قلت أحبك.. أرتعش بي وأبتدا
وكل حرف إليا شعرت إنك ملكتيني شدا
حبنا الصوت الحقيقي وباقي الحب الصدى؟!
ولو يعرف إللي غدا بالحب ..
مثل إللي نعَرْفَه .. ما غدا .
( 7 )
من تـِجين ..
المطر يهدا، وترتاح العواصف ..
ويْتجلى إحساسي إللي غردت فيه العواطف .
أطرب لكل الثواني إللي تمر.
كل ثانيةٍ عمر
آه ياحلوك ويا قصرك عمر ..
فيك أطارد بين ميلادي وموتي …
وأفضح الشوق بسكوتي ..
وأسبح بتسبح راهب …
مغرم بكل المذاهب ..
مهتوي .. مرفوع عن مثلي التعب ..
ولا يهم إللي يعاتب ..
دامني جاوزت حدك يا الهوى ..
وإعتليت أعلى المراتب .
ومن يكون الحب همّه .. لا يهمّه ..
يقطع زمام الملام … ولا يحاسب
( 8 )
من تـِجين ..
ما عاد يعنيني نهار، ولا غياب ولا إنتظار ..
ما دامك الشمس الحضور المعركه والإنتصار ..
ولا عاد يعنيني الكلام إللي يضيع ..
يكفيني إني بك أضيع
يكفيني إنك بي ربيع ..
تشعّبي في داخلي، لك ألف ديره وألف دار ..
إستوطني كل الجهات .. إلغي مسافات الحوار .
دنيا الولّه جنة ونار …
أما نخليها عمار …
ولا نخليها دمار .
على الوعد يا شهرزاد ..
وإلى الأبد .. ينطر حضورك شهريار .
هذا الخيار …
وغيره.. فلا يوجد خيار .
الريـــاض
1995