( 1 )
مرحبا ..
رغم الغبا..!
والطيش ، وجنون الصبا .
أموت في لحظة غرورك
وأنبعث .. لا لاح نورك
وأصدح بحضرة شعورك
وأتغنىّ
مرحبا .. يا مرحبا .. يا مرحبا .
( 2 )
يا مثار الإنبهار..
كل ما آشوفك .. يفارقني الوقار
وأشعل الظلما.. وأشعشع لك نهار
وأندهش كـِلي غصِب
مثل الصغير إليا مسَك ( بندق ) وثار!
أتجلىّ وأترك الدلة تفوح
وتطفي النار
وتروح الريح بأسرار ( الوجار )!
أتعلىّ كِن ما فوقي سطوح ، ولا على سطحي عمار
ولا معي جارٍ كثير الهرج
ولا كِني بدار!؟
أترامى فيك ياالصبح الصُبوح
أبحِـر على تيّار ( نوح ).
أجتاز ألف جدار وألف إعصار
وأقَدِم فروض الولا .. بكل إختصار
وأبشّر الأوتار ..
وأسمعها ، تدندن لِك على لحن ( الصبا )
مرحبا ..يا مرحبا .. يا مرحبا .
( 3 )
وش أبي بالعقل ..
خَلي العقل يرتاح .. وتعالي !
وش أبي بالثقل ..
خَلي الثقل .. يكفيني عقالي ..؟!
أعبريني طول / عرض
وأفرضي قانونك العطري
على فوضايْ فرض.
إنزلي من آخر حدود السما يمي
وأنا لِك أرض!
لا تخافي .. لا تبالي
إمتطي صهوة هبالي ..
وجربي طعم الحقيقة
لو ثواني في خيالي .
( 4 )
دوّريني ، لا شهق برد الشمال ..
وإلبسي حضن الدفا ، وثوب الدفا والشال .
وأسكنيني .. كل ما قل الوفا أو زال .
وغردي باللي تبين ولا حَرَج
علّمي كِـلْ من صِـبَر معنى الفرج.
وإشرحي للناس
كيف إن الأمل بالياس
بالروح إمتزج.
وإن هرج فيك العذول
أقول .. يخسا ويهَبا !
مرحبا .. يا مرحبا .. ويا مرحبا
( 5 )
ثوري على كل الضجر
إستنفري كل النجوم
إغزي مطاليع الفجر.
خذي بثاري من السهر والشوق والتفكير
وسنين القهر.
تمّوجي مثل الفراش . تروّجي مثل الزهر..!
مفتون يا بنت القمر .. وأخت القمر … وأم القمر
مجنون في جهلك ، وحب أهلك ، وعقلك لو صغر!
ترنَمي .. تنغَمي .. تكَلمي
كل الحكي إللي يلمس شفاهك دُرر.
كل إنفعالاتك وصولاتك ولفتاتك (شعر)
يا حلوِك بروحي وفي قلبي وفي وسط النظر.
حبيبتي إنتي … ولا غيرك بديل من البشر.
حبيبتي إنتي غناي .. مناي .. وأحلام العمر.
حبيبتي .. حبيبتي
أقولها وكلي فخَر !
أنا على حبك ربيت
وعشقي المارد .. ربا.
وأنا بحبك لو بغيت ..
أضوي بليَا كهربا !!
مرحبا .. يا مرحبا .. ويا مرحبا .
( 6 )
ضيعيني في الزوايا ..
غيبّيني بين وجهك والمرايا
وأتركي العالم تدوخ ، وهي تصفصف بالحكايا !
ما عليك .. ولا عليْ إن قالوا الشاعر تولّع
من برب عيونك النجّلا يشوفك ، ما يْتولع..؟
ومن تلوحي في فضاه .. ولا يفز ولا يتشلّع ..؟
ومن يكون إللي تمرين بخياله .. ما يتلوّع ..؟
يا هواي إللي تطوّى بالحنايا ..
إتركي عنْك الصبايا .. ولو ترامن في حياتي
يا حياتي ..
والله إنك فوقهن .. تاج الجمال إللي تربّع .
والله إنك شيخة الشيخات ، والأحلى والأروع .
والشهود حشود عندي ، لا هُم بواحد ولا أربع..!
كلهم يهدونك أحر التحايا..
كلهم في مملكة عشقك رعايا
وكلهم مثلي سبايا
ويعشقون إللي سبى .. !
مرحبا .. يا مرحبا .. ويا مرحبا.
جــــــدة – 1994