يوم ( ابن لعبون ) قال:
( كل شيٍ غير ربك والعمل
لو تزخرف لك مردّه للزوال)
ما تعدانا كثير ولا تأخر
كان معنا..
بس ما كِـنّا مَعَه
كنا بزحمة وإنشغال.
طق بيبان الضماير طق طق
لكن الغفوة خذتنا يوم طق.
وطق كبد الشعر مِـنا وضاق حال.
ويوم صبّحنا .. تقَهوينا الفشيلة
ولا لقينا غير كف الريح تردع
والسوافي والرمال .
سافر الضيف وتركنا في وجعنا
آه ليته لو سمعنا .
يوم جزّتنا الذنوب بحدها ذبحٍ حلال
ويوم صار الدمع يلعقنا ويشنقنا بغصاتٍ طوال
ويوم طحنا للتراب اللي تكبرنا عليه بـكـبُـرنا !!
وصحنا ندم..
نسأل الله الكمال.
يوم تصحي يا إبن آدم بالقبر
ما حولك إلا أنت وفقر.
ولا ينفعك عند السؤال
لا كثر مال ولا رجال.
لعنبوا الأحلام ذلتنا وخلتنا ولا نسوى ( نعال ) ؟!
كل ما غناه إبن لعبون صح
ولا يصح إلا الصحيح إللي يُقال
( كل شي غير ربك والعمل
لو تزخرف لك مردّة للزوال )
1995