( 1 )

صوتك الرنان

فتااااااااااان ..

يغترفني من البحر ..

وينتشلني من الزمان !

صوتك الرنان ..

فتااااااااااان ..

كنه إطلال السحر ..

من ورا عتمة مكان !

وآمريني .. وأؤمريني ..

وش تبين من النجوم القاصية ؟

وأجيبها لك صولجان ! .

وش تبين من الجواري

ومن مداري ، وش تبين ؟؟

أسرجت لأحلامك حصان .

قولي .. ورهن أمرك خيولي ..

والشعر والعنفوان .

 

( 2 )

صوتك الرنان ..

فتااااااااااان

ما يروضني بها الدنيا سواه

ولا يعوضني سواه

وآه حلو الجنان .

كل ما ناديت .. رديتي

وصار الشوق بيتي ..

والغزل عنوان .

وكل ما غنيت غنيتي

وجيتي تسبقيني ..

لآخر حدود ومكان .

وكل ما زلت بك النبرة الخجوله ..

أو تعثّر هاللسان ..!

تشتعل فيني شموس من الرجوله ..

وينطفن فيني حسان .. !

وأنفجر بركان

 

( 3 )

صوتك الرنان

آخر ما وصل للأرض ، قبل الصيف الأخضر

من مطر هتان .

أستمع لك وانتشي .. مثل الرفيف –

المنسكب لهفة على الغدران .

دان دان….

سولفي .. وآقول حي الصوت حي الموت

حي المشمشة والتوت والرمان .

دان دان….

سولفي .. حتى يسيل الصوت بعروقي ، ويرويني ..

وأبصرخ ليت تسقيني  : ( كمان ) .

 

(4)

جيتك أتوسد كتوف الريح ..

يهزني شوقي ..

وأهز الكون يا شوقي وأنا طربان.

سولفي يالمهرة الطرقا ..

ولا تطري أبد فرقا ..

ولا أحزان .

ومن هاليوم يا قلبي ..

تقولي لي وأنا ألبي ..

ولا لوعة ولا دمعة ولا حرمان .

صوتك الرنان

فتااااااااااان ..

يغترفني من البحر ..

وينتشلني من الزمان !

 

جـــدة

1999