( صـبـاح الصـمـت )

( 1 )

 

يا صباح الصمت جيت ولا نغم

الحزن يملا الجهات

والمدى يشهق ألم.

سافرت البارحة شمس النهار لوحدها

وأنت ما لك يا صباح الصمت بهجة بعدها

غاب تغريد البلابل عنْك غاب

وأفتقدت أصحاب !!

وجيتنا مهجور بعد عيونها

الله يجبر خاطرك يا صبحنا

ويصبّر الأحباب.

( 2 )

وين صارت ؟

وين في هذا الوجود ؟

في حكايا شهرزاد وشهريار ؟!

أو في روايات الخلود ؟

أواه يا لحظاتها..

وهرجاتها الحلوة وهي بين البنات

أواه يا ذيك السنين العابقة بالأمنيات ..

وين أصبحت؟؟

معقول صارت ذكريات!!

معقول ماهيب هالحياة؟!

( 3 )

نحتار ونشوف الأمل ضيف ورحل لبعيد

من ينزع آهات الشقا من هالوريد

الوقت عـّدا للأسف.. والأمس فات..

ولا بقى في العيد عيد

( 4 )

إنتي معانا بيننا وبعيوننا

نحلم تمدين الكفوف الحانية منا لنا

نزهم يجي طيفك يطوف بثانية ويضمنا

يا دمنا ويا همنا

ويا الطاهرة طهر السما

ما عقب هاللحظة ظما

عيشي ولا بعد الفراق فراق

ما دامك أقرب للسما من كلنا.

إسقي النجوم إللي تمريها بياض

وإكسي الربا من فيض نورك والرياض.

وكل ما فاض الأسى فينا خذينا

وعلمينا كيف نقبل بالنصيب..

بدون حسرة واعتراض.

 

1999