( 1 )
ماورا هذا الظلام إلا صباح ..
ولا ورا سور الكلام
إلا غطيط الأرض حولك ، والنباح .
ولا ورا هذا الحطام ..
إلا سلام يحترق بين المراكب والرياح .
وإنت مو مرتاح ..
لكن ، عايش ومرتاح ! .
صدرك يعز الجراح ويحتويها ..
وظهرك يذل الرماح ؟!
فيك ريبه ..
وفيك قبل الباس طيبه ..
ومثلك إن دورت عيبه .. شفت هيبه
ما تمل من المزاح .
( 2 )
آه يالملاح ..
من قراك إشتاق لك ..
وإشتاق لك من ما قراك !
العسل في مغازلك ..
والعلقم بنبرة شفاك !
وش بلاك إنت الملك ..
والشِعر شعبك وش بلاك !
لا تنشغل في مشغلك ..
خل الشغب هذا وراك ! .
الله خلق طبعك كذا..
لأنت لذا ولأنت لذا
إنسان وحداني .. لذا لا تكسر المصباح ! .
إضوي ضواك الله بخير .. ومغفرة يا صاح ..
وإطوى قراطيس بلت ..
ولا تجرح التفاح .
يا ذنب مغفور وخطا ..
يا كومة أوجاع وعطا
ويا صاحب الكذب المباح .
آظن ، حان المستراح
ولا ورا هذا الظلام .. إلا صباح .
( 3 )
بالباديات إبدا ، وبالبيد أطرد الأحزان
وأقطف نشوة الصياد .
وإليا زرعت إصبر على يوم الجنا
ولا يشغلوك أهل المنى
وإللي فنى قبل الحصاد.
والخالق المعبود ..
لا صار بك موجود
جود ..
ولو بخل بإحساسهم حولك ملايين العباد !
والمسيده طيبه ..
وطيبك سيّدك ..
وإنت بيّدِك لون السما الأزرق وتاريخ المداد !
لكن ترى يالسندباد .. بسك عناد
الغول والعنقا كذب
والغضة البضة كذب
وجزيرة الفضه كذب
يكفي تحب ..
ترى الهوى منّك تعب ..
يا سيدي يا سندباد ؟! .
الريـــاض
1999