( 1 )
المراجل ما تنام
والرجولة ماتنام ..
ولو غفينا غصب عنّا ..
وافترى فينا المنام .
وياسلااااااااام ..
كلنا ذاك ( الهزَبر )
اللي يطق الصدر ..
لا طاب الندام !!.
وكلهم ذاك الكذوب ..
اللي يذوب بمشرق الفزعة ..
ويختار الظلام .
ولو تشوف أشكالهم ..
إذا تكشّف حالهم ..
وإنزاح عنهم زيفهم فجأة ..
أو رتاح اللثام .
ماتصدق يا (عصام ) !
خدٍ تصفَق بالحيا .. وما به حيا
وخد تلطخ بالسخام
وأهل الحكي ..
إللي مناجلهم حكي
وإللي مراجلهم حكي ..
لا يشغلونك بالحكي، وعج الكلام !
خل البهايم تآكل وتشرب .. ولا تعتب
ولا تطرى ملام.
وجرب .. وحاول لو تنام ..
ولو المراجل ماتنام ..
ولو غفينا غصب عنا ..
وإفترى فينا المنام ! .
( 2 )
سوّد الله وجه ما به دم ..
إلى من جاك يترنم ..
وإلى أقفى ذم !
وبيض الله وجه يتبسم
معاه بغيبته تغنم ..
وتنسى الهم !
ويا صبر أيوب ..
وش فينا ..
جفينا إحساسنا وعشنا بدون قلوب ؟؟
وش إللي صار بالدنيا ..
مشتنا ..
أو مشيناها على الشقلوب !
فراغ عيون .. يمكن ؟؟
أو فراغ جيوب !
صراع ظنون..يمكن؟
أو صراع ذنوب !
أدور وين عن عذر يساعدني على الفكة ..
بدون هروب .؟
أدوّر والشقوق شقوق ..
أدور والحروق حروق ..
وش إللي بس يسترنا ..
وحنا شالعين الثوب .. !
ومن إللي بس يعذرنا ..
وحنا (جدنا) عرقوب !
وحنا لعبة الأيام..
جرب وحاول لو تنام ..
ولو المراجل ماتنام..
ولو غفينا غصب عنا ..
وإفترى فينا المنام .
( 3 )
ودق هاتف ..
وإنتهت كل السوالف ..
وقالت الحلوة ألو ..
قلت إسألوها وإسألوا قلبي ، إذا فزفز طرب .
يحلا الطرب فيها ويحلالي الطرب ..
الله ياحلو المعاني وهي تشب بثغرها
والله ياحلو المغاني وهي تهب بنثرها
والله ياحلوالشعور اللي يهل وينسكب
من سحرها
والله ياحلو الحيا وحلو الأدب ..
و لو كان كذب في كذب !
خل الجميع يعيش ..
وتعلم التنطيش وإنسى ..
أو تراك بتكتئب !
وشفيك مشغلني معك ..
ما أروعك ساكت ..
وإذا ثرثرت لي يا موجعك .
مليت ماآبي أسمعك ..
قم وإنسحب !
ماللضمير بعالم الدرهم سهم ..
والخاسر اللي ما فهم ..
أو تاه في وهم الطرب
وسط الصخب .
ولجل أسعدك ياهالضمير ..
أبوعدك ..
إني بأحاول ، قد ما اقدر ، ما أحب.
يمكن لو أتعود أنام ..!
ولو ا لمراجل ما تنام ..
ولو غفينا غصب عنا..
وإفترى فينا المنام .
عـمــان – 2000