( العوج طبـعك .. )

( 1 )

العوج طبعك .. وأنا طبعي الصراحة

إتركي الشاعر بهمه .. وإتركي القلب بجراحة

مابها الأيام راحة

مابها الأيام راحة .

وش أغيّر بالصخر ..

الله عطى الصخر القساوة !

وش أبدل بالبحر ..

هذا البحر ..  موج وهداوة !

أعترف لك ..

ما قدرت آفك ( قفلك )

كنت أظن إني أبكبر فيك

لكن .. صرت طفلك .

ليت قلبي ما عزف لك هالخضوع المر

ليتك ما كسرتي له جناحه  .

ليت لو عشتك خيال .. ومت يوم أشرق صباحة .

مابها الأيام راحة ..

مابها الأيام راحة .

 

( 2 )

حايمه مثل الفراش..

تتبعين  النور لكن ترتمي بالنار

في عمى ولا غباش

تدعين العقل .. وإنتي جهل و إستهتار

زايفة مثل الخزف ..

ما أنتي المروج ولا زهور الجلّنار !

هايفة يا للأسف ..

ما بك ثبات ولا شموخ ولا وقار

صرت أشوفك في عيون الناس كذبه

وفي يد الأطفال لعبة

وفي بياض الصبح عار .

وصار زيفك ..

دهشة أولاد المدارس ..

وسالفت كل الصغار ! .

إفترى فيك الغبا والنقص

أو فيني إفترى حلم الكبار .

وش حصل .. وش يا ترى ؟

محتار بك محتار …

ليه تاجك من زجاج أصبح ومكياجك غبار

وليه صرتي مهزلة وقت وصخب تجار

وليه أخذتي من حياتك بس ذاتك

وزهوة الديك ، وغرور التيس ، وأفكار الحمار ؟!

وليه ما جيتي ملاك من السما ..

يستحق إني عليه أغار .

ليه بس إنتي كذا ..

وليه أنا حظي كذا

ليه يا شمس النهار ؟ .

 

(3)

ما خسرتي شي ..

ما دامت حياتك كلها أوهام .

من أولك لين آخرك أوهام وسط أوهام .

وعلامة إستفهام ؟!

يعني ما خسرتي شي ..

ياللي في البشر لا شي ، له راس وجسد وأقدام .

ما خسرتي شي ..

لكني خسرت سنين ..

خسرت شهور

خسرت أحلام .

وجيتك أعلن الفرقا

وأودع وجهك البارد .. بدون خصام .