(1)
إضحكي ..
لكن ترى هالضحك ..
ما يبري جراح
ولا يبل أرياق..!
إضحكي ..
وبآ جاملك للصبح
وأدري الصبح، صبح وينتهي..
أو يبتدي بفراق ..!
إضحكي..
ولـِك العذر..
هذا الوجع والضيم والموت الـحَمَر..
جلاد ما ينطاق..!
إضحكي..
وأباشعلك بيني وبيني
وأبانثرك من أصبعيني
وأحرق الأوراق !
الله يسعد ضحكتك..
ويٌلطف على العشاق!
( 2 )
فيروز غنّت أو بدا النيروز
لا تفرحي بلحظة فرح..
لا تحلمي بالفوز! .
خلاص قلبي كَنّ..
وقلبِك غدا لضيف الحزن.. محجوز.
يا مَتعب الدنيا خَذَتْ كِلْ شي ..
ولا زالت تبي.. وهل مِن مزيد؟!
ويا مـِتعب كتوفك
وهي دنيا ، ولا أدنى من كذا..
كومة من تراب وعبيد .
يا (العيد ) عجّل ، أَو تحزّم بالصبر يا (العيد ) ..
براحتك يا عيد..!
ما بيننا نجــوى ولا مشتاق
ولا فيك ما يسوى ولا ينذاق
يا مُرّك ولو صارت الضحكة طعم..
مثل الوهم.. ترياق!!
ما بعد موتك يالشعور عناق!!
إضحكي..
لكن ترى هالضحك..
ما يبري جراح
ولا يبل ارياق ؟!
إضحكي ..
وبأجاملك للصبح..
وأدري الصبح ، صبح وينتهي..
أو يبتدي بفراق.؟!
عـمـان … ينـاير
2000