( 1 )
وجت عجلى ..
ونظرة عينها وجلى .
تقول الخط ..
ليه البارحة مشغول ؟!
طول البارحة مشغول ؟!
ما هوب معقول ..
أنا ما أبى عذر منّك..
أنا قلبي قنع منّك ..
خلاص أبعد وأنا ببعد ..
وترى كل السبب منّك ..
وراحت بأرضها راحت
وريحة غدرّها فاحت .
( 2 )
سخافة من سخافات الزمن أنتي . .
حقيقة زايفة كنتي ..
مواطي خيل ..
سحايب ليل ..
ظلام أسود على قلبي ..
تفاهة تدعي حبي ..
وش أنتي .. ؟!
ومين هو إنتي ؟!
غبار أصفر على ستارة
بقايا سيل في حارة
وش إنتي .. ؟!
ومين هو إنتي .. ؟!
ثلاث حروف ..
وخيشة صوف .
( 3 )
أنا ما زار تفكيري وهم مثلك..
ولا قد لاح في بالي مثل شكلك..
عرفتك حرف
وحروفي كثيرات العدد والوصف ..
عرفتك توه الساعة ..
بداية موت ..
ونهاية صوت ..
وصحارى صيف خداعة .
( 4 )
ترى الديرة كثير أطفالها حبي ..
روحي ولعي وشبي..
كثير عيونهم عميا ..
وكثير حلوقهم ظميا ..
وكل شاهر سيفه
وبين الناس ..
يقول إسمي أنا القناص ..
وطول الليل ورا الجربوع..
بين صخور بين تلوع..
وعليه أمه ، بوسط الدار ، تهل دموع..
( 5 )
تنقي يا غصين ألبان ..
( تنك ) فاضي (وتنك ) مليان . .
هذيك عيون سهرانة ..
يزنزن حولها ( الذبان )..
وهذيك عيون ولهانة ..
على كازا وعلى لبنان ..
وهذيك جيوب مليانة ..
ورق شوق وورق دخان. .
تنقي السوق ما يخلا ..
رجال أكثر من النسوان ..
خذي أخبار (بن شداد )..
ومجد (أعشى) (وماجلان)..
سوالف فاتحين الهند ..
وديار الفرس والأسبان.
( 6 )
إشارة والجميع يصير ..
على طوعك ـ تحت أمرك بلا تقصير
إشارة من طرف عينك ..
يصير الحلم بيدينك . !
الا يا كِثرنا عشاق ..
والا يا قِلنا أخلاق .
وهبنا الوقت لك يا بنت
وصرنا كل أبونا بنت .
توقف يا زمن تكفى ..
توقف يا زمن لا هنت .
( 7 )
بكل شارع ..
عباية (زول) مرفوعة ..
وبشر يا حول مخدوعة
وريحة عطر مثل السحر ..
وضحكة غنج مسموعة ..
ولهاة من العطش تعوي
وقهر يكون قهر يشوي
و(عيال) ما بعد فطموا
بسيل أرقامهم يرموا
على منديل ..
على كرتون ..
على قطعة ورق حمرا ..
على البيضا وعلى السمرا ..
أنا أسعد أنا محمد ..
أنا ناطر على الموعد
( 8 )
مثل ما تكون ..
حبيبة قلبه المجنون .
طعم سكر ـ طعم ليمون .
صغيرة أو بدون سنون .
وكاد أن إسمها أنثى
بلا ( شارب ) بلا ( لحية )
بلا جوهر بلا مضمون .
يبيها مثل ما هي تكون .
( 9 )
وإذا جا الموعد المحبوب ..
تقول إنت قدر مكتوب
ويقول إنتي قدر مكتوب
عشقتك قبل ما شوفك
يا أول حب وآخر حب وأغلى حب .
وترد بصوتها المبحوح :
يا أول حب وآخر حب وأغلى حب .
أنا ما همني شوفك ..
أنا ما قد عرفت الحب قبلك يا مناة الروح .
أبيك تشيليني نغمات بحروفك.
أنا ما همني شوفك ..
أبيك تشيلني نبضات في جوفك .
أنا ما همني شوفك ..
وش ظروفك .. ؟ أبي شوفك
(11)
غلبنا قيس مع ليلى
هوأنا أعذب وأحلى
نسينا الصدق والمبدأ
وتاجرنا بمشاعرنا بدون حدود
ورمينا إحساسنا للدود
وخلينا بهايم نفسنا ترعى
بلا مرعى وبدون قيود
وما خفنا مصايرنا ..
ورب خالق معبود .
(12)
كلامي قلته ويكفي ..
وتبي تقريه مشكورة ..
وتبي ترميه مشكورة ..
تساوت عندي الصورة .
وقولي ويش ما تقولي ..
حكي ثرثار
كلام أشعار
طشاش أفكار
حروف خبال منظومة ومنثورة
يصير إللي يصير اليوم
نسيت إسم العتب واللوم
وأكررها ..
تساوت عندي الصورة .