( 1 )

لَف سيجارة .. ودخنّها ..

وقام ينفث ويْتأمل بالفضا ..

وحوله فضا ..

وفي داخله قلبٍ توضا بالرضا

وشيٍ من أطباعي ! .

 

( 2 )

 

حيّا الله( الراعي ) ..

حيّا الله إللي ما نقل هم الوناسة والهروب

حيّا الله إللي ما حمل هَم السياسة والحروب

حيّا الله الجار الطروب

حيّا الله الراعي .

 

( 3 )

 

يا مطلق شراعي ..

بْشَوفك أشعر إن الصدق حي ..

وحي وجه ما كساه الزيف يوم

ولا تزاحم في هموم

وفي تعابير سخيفه

مالها داعي .

 

حيّا الله إللي شامر ثوبه بعز

وشالق جيوبه بعز

وعايش عبد المعز

ولا ورا هالعز عز ينبغى ..

يا مطلق شراعي .

 

( 4 )

 

قال: ( المدن ) ..وش ذقت فيها يا ولد ..؟

قلت :النكد ! ..

ما شفت في قاع المداين مستريح !؟ .

قال: ( القرى ) وش عشت فيها يا ولد .. ؟

قلت :الرغد ! ..

لكنها لاجا المسا مثل الذبيح !؟

 

قال: الفلا ..

قلت : الفلا سعد الولد ..

ما به حسد ..

ولا في مفاليه المنافق والشحيح !

إرعى رعاك الله

أبا نسى الكل ياالراعي ..

لا تنبش أوجاعي ؟! .

 

(5)

تدرى وش آخر ما كتبت البارحه ؟؟

كتبت دنيا رايحة ؟! .
يعني ولا تسوى تعبها وهمّها ..

من ضمها خاسر ..

وخاسر، من تركها في ضلوعه سارحة .. !

دنيا تعوّفك الصديق ..

دنيا على كبر الأماني والوهم ..

دايم  تضيق وجارحه! .

 

وتدري وش آخر ما شطبت البارحة ؟!

شطبتها ..

شريت نفسي وبعتها

قال أشهد إنك جبتها ..

دنيا بدون إيمان ما هي صالحة !

ودنيا بلا إنسان قشره كالحة !

 

أشطب تراها للفنا ..

ويا شقوة الواعي .. !!

ولف سيجارة ودخنها ..

وقام ينفث بالفضا ..

وحوله فضا ..

وفي داخله قلب توضا بالرضا ..

وشي من أطباعي .

 

ضاحية سالم … الأردن

2002