إطفيّ شْموعي ..
وخليني أشوف المعتم ، المقبل عليْ ..
وكانها بتمطر علي ..
وكانها طوعي ! .
فات من العمر أمسه ..
وهو نفسه معي ..
مسجون في طبوعي ! .
اليوم ..
وش كثر الذي عدّا ..؟؟
كأن سنيني السبعة ..
سبع أيام ..
ما فيهن نهارٍ من نهار أبدا ..
و ش إنت إلا سبع أحلام يا أسبوعي !
بجوع وبرجع أشبع ..
ثم أجي لك شاهر جوعي !
وابرجع من سفر وآودعك ، وأستقبل دموعي !
ومثل ما وردك إللي ضمّه ( البوكيه ) يذبل ..
لا تقولي ليه أبذبل ؟؟
جف ينبوعي !
سنة حلوة ..
ودام مبداها معِك ، بتصير حلوة ..
ولو تـِجي سادة ولا فيها زيادة ..
قلت حلوة ..
مثل طعمك في ضلوعي ..
لا هدَا روعي .
إختياري ليلتي هذي ..
ولا هي بإختيارك ..
إضوي إحساسي بنارك .. وإطفيّ شْموعي .
وخليني أشوف المعتم ، المقبل عليّ
وكانها بتمطر عليّ
وكانها طوعي .
( 2 )
تغتسل من حولنا (عمّان ) ..
والقطرات مدهوشة ، على الشباك تسبح ..
والشتا ترتيل..
من ساعة نزل .
ومن سكون الليل كنا نسترق همس الدخيل ..
وأهة عيال السبيل ..
ومن سعل .
عيد ميلاد جديد
وجيد أشهى من خيال الشعر في عز الصهيل..
وفي الغزل .
شهقة تصبح على صحرا ..
وتمسي في مسيل
وفي نخل .
وزفرة من عشق إنتي ..
تشبهين اللا مثيل ..
وتشبهين المحتمل .
في عيونك من زمان أبحرت لكن ما وصلت عروضها ..
و المعاني في عيونك خوضها ..
ما هو بسيط ..
ولا سهل .
تحلفين ولا سمعت إلا الهوى ..
ليت الهوى يصدق ، وليته ما يميل ..
ولا يبدّلهْ الزعل ! .
تحلفين وموعد الفرقا على بابي وصَل..
خلي اليدين معطّرة بالشوق ..
إنسي الشوق ..
وإنسيني ..
وعيثي في خضوعي
وإطفيّ شْـموعي ..
وخليني أشوف المعتم المقبل علي ..
وكانها بتمطر علي ْ ..
وكانها طوعي .
( 3 )
الأربعين ..
الشايب (المغرور) قرّب ينحني لي .
كان مدّ الله في جذوة فتيلي ..
وصحصح من الموت جيلي ! .
زغردي لي يالقوافي ..
حفلة الشيب إبتدت وإنـهّد عزّالله حيلي .
وش أقول لطلّته لا طلْ .. ؟
ذاك المقبل إليّا طل ْ ؟
وتالي هالمعارك طلْ .. !
ويا عيني ، ويا ليلي ! .
وش أسقيه وسحابي قَلْ ..
ولا به ظِل ..!!
ولا به من يحل المشكل إليا حل .. !
وأنا مقطوع سيلي ؟! .
تعبت من الدروب الطين وهروبي
تعبت أضحك ورا ثوبي ..
وتعبت أعدد ذنوبي ..
وأعبّي في شليلي !
متى الأيام تصفي لي
وأشوفك يا دليلي
وأضمك يا دليلي..
أضمك في ضلوعي .
وإنتي يا ربة ولوعي ..إطفي شموعي
وخليني أشوف المعتم المقبل علي ..
وكانها بتمطر علي ..
وكانها طوعي ! .
9/12/ 2001