( 1 )
بيت من الحجر .. و ( طعوس )..
وعزيزٍ ضمني ظله .
وقلبٍ كنت به محروس ..
وسع ذا الكون ذا كله .
وديرة بردها دافي ..
وناسٍ ما داخلهم غش ..
على كيف الهوى الصافي
وقوافي تسكن عيوني
وقصيدٍ يسكن لحافي ..
عوافي يا زمان الشيح
والتهليل والتسبيح
عوافي ، وين وداك إشتعال الريح ..؟
طفيت ولا ضوتْك شموس
ولا شفنا بعَدْك عْروس
ولا حتى ..
بياض نفوس .!؟
( 2 )
مساء الخير يا (جدة) …
حظي جابني يـمّك ..
وأنا أدري بِك ..
يزورك من يزورك ..
ما دريتي بَه ، ولا همّـك ..!
على رغم الهجير ..
الثلج
أحسه يِسْبَح بدمك ؟!
وعلى رغم البحر ..
كل الجفاف إختارك وضمك ؟!
رخام ..
وطين ما به روح ..
وصباحٍ كنّه المذبوح ..
وزيفٍ غَمّك وصَمّك ..
عن الهمس
ومعاني الهمس ..
ونشيد النورس المجروح .
( 3 )
سهر ..
والليل كنّه ليل ..
غريبٍ ومْتغيّر حيل ..!
أدوّر فيه عني ..
عن بقايا صدق
عن صاحب يشيل الشيل .
أخوض بعالمه بين الحطام ، ورعشة القنديل .
سهر ..
ماعدت أميّز فيه بين الناس والجدران
ولا بين البكا والدان
ولا بين الغبي المتروس ، والطفران
ولا بين السجين و(خِشّة) السجّان
سهر ..
وتشابهت كل اللغات :
وكلها حرمان .!
هروب ..
وكل شي يذوب .. !
دمعٍ بالعيون يذوب
همٍ بالقلوب يذوب
شمعٍ الصحون يذوب
وفنانٍ مهوب فنان
وستاير ما لها معنى ..
وعمى ألوان .!
( 4 )
معك يالطفلة إللي من عرفتك وإنتي الطفلة
معك من أول الحفلة
معك لين أول الحفلة !
معك يا للي على صدرك
هموم كثير محتفلة
ومعك مفتاح بابٍ ضايعٍ قـُفلة
ومعك همْ ( قْروي )
صابه على غفلة!
تقولي : شاعرٍ كذاب
أقول الصدق ينـزف له
صريح ، ولا عليه حجاب
وفن الحب يعرف له .
وكل الأرض لو حبِك ، ولو مرّه
تشوفيها كثير أحلى
وكل الكون يهتف له
ويعزف له ! .
( 5 )
خذيني من الجنون ..
أحتاج للأكثر .
خذيني للسكون المدهش الأغزر.
أنا عِفْت إنتصارات الحضارة
وأنا مهزوم مهزوم بجداره
أبا نسى في مساحاتك وجودي
وأبا بدفن في شواطيك المراره.
صغير ..
لا تغرك بصمت الأيام في وجهي
أنا الدنيا كست وجهي
مثل ما غيّرت وجهك
مثل ما غيرت وجه السنين
وقالت إتجهي !
صغيرٍ ما عرفت أقرا ولا أكتب غير في الأحلام
صغيرٍ ما عرفت الفرق بين الصدق و(الأفلام ) .
خذيني ..
قبل أمِلْ من الـمَلْل تكفين ..
خذيني ..
لين أصير إثنين ؟!
( 6 )
وجع كل الشوارع داس تفكيري
ولا أدري ..
إذا كنت الخَطا ،
ولاّ الخَطا غيري
على عكس الصحيح أمشي أنا .. ولا الصحيح العكس ؟
تحيّرنا ، وتِحَيّر كِلّنا من كِلّنا ..
وإحتار فينا العكس ؟!
مِتى يا أمس ؟
متى ياالـمِختفي بين العروق وفلسفات النفس
متى تشرق على اللي ما لمَح من ألف صبحٍ شمس ؟
متى تِتْوحد الأحزان بالأفراح
متى بال الشقي يرتاح ؟!
( 7 )
أحِن، وحيلة العاجز
إذا يبغى المحال .. يحن !
يدوّر بالـحِلْم ديرة
يدوّر بالفكرْ موطن !
يسافر بالخيال المشرق الدجّال
يغيب بغيبة التّرحال
وإذا ما واعد الفرحة ..
يعانق خيبة الآمال !
وكيف الحال !
وأنا ما جتني الأخبار من مدّة
وش آخر ما كتبتي من شِعر
وش آخر ما رميتي في البحر
وش أخبار المسايير الغلابه
وش أخبار المصايد والذيابه ؟
وش أخبار السهر والفن ..
وأهل الفن ..
يا جدة !؟
جـــدة – 1988