هذا هو إللي كان
في لندن وفي كان … وفي باريس
السبت ما يفرق عن أيام الثلاثا والخميس
الحال فوضى
والشوارع طلطميس!!
وأنا .. وسواح ومرايا
من ضحايا إبليس
وش همَنا
( الله أكبر يا شعيب ضمّنا )
قطعان ..
ندوج في حلق المكان
بزعمنا أحرار..!
اللي طلع من ( دار )
واللي دخل في ( دار )
هذا معه ذيبان
وهذا وراه ( ح …..) ؟
أمرار ( يا شاهين )
وتـُخمه ورفض ونار وإستنفار
وأشباه مثل إللي نحب..!
بلوننا وبطولنا من حولنا
ودرب تعيس
ملبد بضيق وصخب
وأقدام تلفانه على صدره تدب !
إللي تدّور عن ونيس!
وإللي تدّورعن عريس .
وإللي تدور تيس!!
( سل مجد بغداد وعزة جلق….
واقرأ من التاريخ كل فخار )
( 2 )
( شاهين ) :-
لا تعتب عليْ
البارحة طبيت يا شاهين أرض الشام
جيت ومعي كومة كلام وبس
طفران من كل شي
إلا من الأحزان قلبي مِنـترس!
( شاهين ) :
جوعك نصل سكين وعَبَرني..
إعتبَـرني حي ، وإنساب وسبرني…
لآخر حدود النفس..!
ولْ.. يا طعنٍ عذرته ما عذرني
مزعةٍ بالجوف توجع
تحت نور الشمس ما هي بالغلَس..!
( شاهين ) :
جوعك ما يلام..
لو صفّع إحساسي وشام
ولو هو تعلق بك غرام
وفيك قبل الناس حس..!
( شاهين ) :
تكفيك الدموع..؟!
والله ثم والله هذي حيلتي..
ما أملك إلا هي
وهي ما تملك إلا البوح
مثل الروح
إللي بكف الموت والميلاد
مثل الضاد.. بشفاة الخرس!!
( شاهين ) :
تلقاها منين ولا منين ولا منين ؟!
شاهين جعل الله يعين
ما عاد للصدق أصدقا
ولا عاد للفارس فَرس .. !
( سل مجد بغداد وعزة جلق
واقرأ من التاريخ كل فخار )
( 3 )
هجير يلفح بالوجيه ..
وبرد يسكن بالضماير ، وإختناق وصيف .
والشاعر الطاوي الكِفيف ..
يتعثـّر بستين عام
ويصارع أمواج الخريف ، بلا عصا .. يا حيف !
مهلهل القامه ..
عظيم الحزن ..
محروق .
يصرخ على الطرمان وأهل السوق .
من يِشتري الديوان ..؟
من شان الله يا جماعة
مية ليرة أو رغيف .
يا آاااه
يا هو مزلزل هالتـَعَب ..
يا هو صعَب
يا هو يهز أوطان ويدّمر شعَب .
ويا هو مخيف
إنك تشوف به الزمن
وجه العفيف
إذا تعفـّر بالمذله .. تحت نعل الفقر
وإنداس برصيف !
( شاهين ) :
وإللي طمّن القاع
ورفع قدرك بعيني..
إنك تزيد أهل الشرف ، يا صاحبي تشريف .
دمــشـق
1997