( 1 )
لو سألتي :
ليه ودعّت الطرب..؟
ليه فارقت الضجيج بلا ضجيج
وليه فضّلت الهرب..؟
ليه صوتي مات في صدري
وذاك المنهل العُذري نضب..؟
ليه جافَاني من الجلاس الأجوف..
وليه جافيت الصخب.
ليه ما خنت وضعفت !
ليه صكيت الدفاتر وإعتكفت !
ليه بين الحلم والواقع وقفت !
وليه ماطقت الصعب !
وليه نوري عن سما اللي ما لهم أرض إحتجب..؟
لو سألتي ليه أقول:
أحب..
وانتي اللي أحب!!
( 2 )
اكتفيت..
من العيون الحور
من نفح العطور
من البلابل والسنابل والزهور .
واكتفيت من الرجا والإنتظار
من وحشة العتمة
ومن بُعد النهار .
( 3 )
إكتفيت من البكا بليّـا دموع
من التوجّد والخضوع
من الشموع اللي طفتني
قبل ما تضوي ضلوع.
من الوجيه اللي تصبّح بالمسا
واللي تمسّي بالصباح
من التعب ،
من الشقا ،
من الغضب
ومن الجراح .
إكتفيت:
ولا لقيت إلا بك إنتي المستراح
يا هوى يسوى جميع اللي هوى
ويسوى القصيد ،ومن قراه ،ومن غوى
ويسوى جديد المحتوى ..
وذاك القديم اللي تولته الرياح ..
وداخل أعماقي غرَب .
وإذا سألتي ليه ؟ أقول:
هذا شعور إللي يحب !!
الـقـريات
1995