( 1 )
إستقاله!!
ماله إلا الإستقاله..
طالما العالم جفاه
ولا وجود ولا اصدقا له.
الهنا ولىّ لغيره.. والشقاله.
وكل سفحٍ ما لقى إلا الخوف عنده.. من رقى له .
عالمه .. ماهو سَهاله .
والحياة اللي وراه
اللي معاه
اللي قباله ، وش تكون ..؟!
إلا حكاية (برتقالة )
ماتت بكف الزمان..
فدوةٍ لك يا الغزاله.. !؟
( 2 )
ما أَبَي ثوبٍ قِصر عَني وقصّر ، من كبرت .
وما أبي كاسِ ظمِي لغيري ..
وظميته وانكسرت .
ولا أبي هروب كذوب
يقول : مبروك إنتصرت..!
ليتني قصّرت..!!
ليتني قبل الشتا ، جبت الشتا وأمطرت..
ليتني قبل البكا قبــل الدموع أبحرت
ليتني قبل الفضا والريح والجنحان طرت.
أوحفرت القبر بيدي..
ومن وريدي قمت أسيل بنـزفي الصادق قباله
لين يغمرني سؤاله ..
أو يريحني التلاشي في ظلاله .
أو يغيّبني ممات .
وكل موت يموتني..
فدوة لك يالغزالة
( 3 )
السكوت أدفا كثير من الدفا ، وأبرد كثير..!
وإنتحاله..
ضرني ما سرني وقلبي عفى .. وكان الكبير ؟!
وش تقولي .. ؟
لا تقولي .. قالت العالم: غرير!!
إقبليني مثل ما التفاح يقبل كل كفٍ تحضنه..!
وقابليني مثل ما الغربة تغيب بعين من رد وْطنه..
وإزهميني دندنه .. أو إحضنيني سلطنه..!
ثم إشغليني بالحساب .. وبالعلوم..
وبالهدوء .. والشيطنة؟!
تحت أمرك يا سمو الحب .. آمر
الحياة المستحيلة لو تبيها .. ممكنة
وجهك أنتي ..من يصبح في مساه..
ومن يمسي في جماله.
لو يكون اللي بقى له
يوم من عمره ،يبيعه..
فدوةٍ لك يا الغزاله!
( 4 )
يا جناب العشق جيتك..
ما معي لك غير أنا ..!
إختر إللي تهتويه.. إما أنا ولاّ أنا !
يا ضرامٍ يشتعل فينا ويطفينا هَنا .
ويا كلامٍ في شفايانا فنانا ولا فنى..!
ويا سلامٍ داعب المجني عليه .. ومن جنى ..!
في سبيلك ..
لو لقيت إللي لقيته .. ما تصدق
الحكي يا مَكْثره .. خِذ ما تبيه ولا تدقق .
أدري إنك صعب تفهمني ..
ولكن ..
حاول إنك يوم ترفق .!!
دامني فيك مْتوله للثماله..
مثل من ضيع يمينه من شماله ..
يوم خط الإستقاله..
فدوه لك .. يا جناب العشق .. مّرة..
وألف مرة للغزاله؟؟
جدة 1993