(1)
قالت ولد مجنون
قلت: وعاشق مجنون !!
من خَـلـْـقت الدنيا ومثله
ما خلق بالناس مثله
رغم قسوتهم حنون !
أسمر ، سقته الشمس ماها
لين فوّح في مداها .. وأدهش الليمون !
وأبيض من أوراق السحاب
ومن عباب الما.. ومن نبع العيون .
روحه غمامة من سما
ونوحه ظما ..
وبوحه رفيف غصون !!
موزون .. لكن لا سمع صوتك
تبعثر وإنهمر.. وإختل فيه الكون!
ومحزون .. لكنك تنّسِيه الـحِزِن
كل ما حضن طيبك شقاه.. وهدهده بالهون .
ومفتون.. لكن فتنة العاشق مراتب
ومن تكوني عشقة إحساسه ..
طبيعي لو رفع راسه ، وعاش بمرتبةِ مجنون.!!
قالت: ولد مجنون ..
قلت: وهايم مجنون!
( 2 )
تدرين وش معنى (مساء الخير )؟
تدرين لا طارت من شفاهك من إللي يطير ؟
عقلي يطير ..
وكوكبي يفتّر عكس الإعتياد من الطرب
والمستحيل يصير ! .
آمنت بالله القدير
حَـلْ الدفا.. والبَرْد فارقني وفل الزمهرير
ورجعت حيْ …
وقلت : حي الورد الأصْفر والعبير
حيْ الصباح إللي تشابك بالمسا، حي الحرير!
حيْ المهاة إللي تبوس أقدامها كل الفلاة
حيْ الحياة إللي طَعمْها يشبه الجنة كثير !
قولي مساء الخير
أورّق وأنبِعِث وأكون.
ولا تسالي وشلون؟
مجنون… ومن قولي بربك يسأل المجنون؟!
إلا واحد مجنون!
قالت ولد مجنون
قلت ومغرم مجنون .
( 3 )
مَرّن ثلاثين .. وعليهن من سنيني زود
وكان العقل موجود!
لكن.. وش جنيت من العقل .. ومن الثقل..
ومن الليالي السود؟!
وش فادني صبري..
ومقطان الحنين إللي سرق عطري سنين وبادني ..
وش زادني ؟
ما زادني إلا جفاف .. إسمه رشاف المجد!
والمجد زيف إن ما عركته باليدين المجد؟
المجد لله في علاه..
وفي ثراه .. ما غير حبك مَجْـد !!
يا شوق مشغلني معه..
ويا طربتي لا فزّت من أقصى الضلوع الأشرعة
أنا آتوجّد وَجْد
ويا جـِعْل قلبِك ما يذوق إلا رفيف الوَجْـد .
يا عذبه العنقود..
إشتقت لك.. وإشتقت للبارود
وان كان بك مثل إشتياقي
فجريني بالتلاقي وإنسفيني جود
أنا إحتراقي في عيونك.. كل همّي .. وغاية المقصود.
ولا همنّي هَرْج الملا.. خلي المَلا يحكون .
مجنون .. ومن قولي بربك من يسأل المجنون
إلا .. واحدٍ المجنون!
قالت.. شاعرٍ مجنون.
عــمـــان – 2000