( 1 )
الأخيرة
شيخة الحور وقمرهِن
بيضِهن وأحلى من سمُرهن
وأجمل أجمل ، من عرفت من العذارى
وأكمل أكمل ، من مشت بين العذارى
والمحال الممكن الصعب السهل
البعيد إللي وصل ..
وشهقة الشعر وزفيره ..الأخيرة
( 2 )
ريحّيني من أبو زيد الهلالي ..
والملوّح ( قيس ) .
إقلبي التاريخ بعيوني تعالي ..
وإشرقي ( بلقيس ) .
إمنحيني بالشهر حصة غرام.
درسيني في مجازات الكلام.
علميني الفرق
بين المبتدا ، وبين الختام .
عافوا الطلاب جهلي
وفكري المسكون حيره !!
وعُـفْت أنا التدريس .. والحصة الأخيرة.
( 3 )
كل مهنة غير حبك
يا بعد عمري ( سخيفة ).
إتركيني فيك أهيّم ..
وإتركي نبضي بكيفه.
رزقتي شوفت عيونك
والهيام أروع وظيفة !؟
لا تلفيني بسكوت ولا تذليني بصمتك.
غردي يالعنبوها ( خفقةٍ ) ما صهللتلك
إنحري رقاب الأماني والظنون
صبّحي عيد الجنون
فجّري بين العواذل .. حسرةٍ تعمى العيون.
خبريهم من تكوني ..
خبريهم من أكون؟
ولا تهابين السيوف إللي من الغيره مغيره
دام باقي للأمل فرصه أخيره .
( 4 )
كنّك الديـمة نزلتي
في مرابيعٍ خليّه
بـِـك تِـجدَد روضي الذابل
وشال السامرية .
إن طلبتك حلم ..صرتي
وإن بغيتك واقعية .
بالصحاري ريم عفرا..
وبالشواطي ساحلية .
عشتك بكل الحضارة
وكل ذيك الجاهلية .
في ليالي الصخب كنتي ..
وباليالي الشاعرية .
يا بنية : يا فضا العاشق وطيره
ما نسيتك .. وأذكر القصة الأخيره
( 5 )
إزعلي .. ما أقول حدّك
سافري في كل وقت لديرة عنادك وصدّك
إنزفيني
إعزفيني
عاتبيني.. وش يردك ؟!
آه يا زين العتب .. لا من تحدّر فوق خدِك.
وآه يا حلو الرضى عُقب إنفعالاتك وشدّك .
لولا لحظات التِغِلي والتظلم والظليمة
ما عرفتك وياالتجلي ..
ولا غدا للأنس قيمه .
ولولا ذلك يا الظما ذيك ( الظهيرة ).
ما عرفنا عزّها ولا قدرها ، القطرة الأخيرة.
( 6 )
في مساحتك يضيع الهّم ، يرتاع برَحَبْها .
كنّه جبال الجليد وكنّك الشمس ولهَبها .
تزرعي شكواي وأطلع غنوةٍ يصدح طربها
تمنحي ظلماي صافي نورك الأسنى والأبهى
تاخذيني طفلك المطلي شقاوة
تغسليني بالدموع وتمسحيني بالتلاوة
وتبهجي حزن السريرة ..
وأبتسم لك
وأعزف الآه الأخيرة .
( 7 )
سامحيني لو بخلت أحيان وأحيان بكلامي
لهفتي لك يا غرامي دوم تسرقني كلامي
ومسمعي من ثرثرة شوقي يغار
ومن لساني لو تغزّل بك يغار.
وداخلي ديرة وشيبانٍ قدامي
ودّهم بالإختصار !!
والحكي ريح ومراكب لليتامى
ولا على أرضي بحار !!
والمعاني لص بين الناس بارع
والحرس في كل شارع
وإبتهالاتي كثيرة
أرتجلها بس.. في اللحظة الأخيرة
( 8 )
من شمال أقبلت أسابق في طموحي
أحْسِب الدنيا طموحي
أحسب القصوى طموحي
أحسب العليا طموحي
لين جيتي..وإبتدا فعلا طموحي!
إنغرستي بين ما أشوفه وشوفي
بين رغباتي وعزوفي
وبين جثماني وروحي.
كنّك بصوتي الحروف الأبجدية
والملامح والهوية
والتعابير الصغيرة .. والعشيرة ..
صدقيني
إنتي أول من عشقت من النسا ..وإنتي الأخيرة .
( 9 )
كل أنثى غيرك بعيني سراب
وكل منفى غيرك إجحاف وعذاب
وكل حبٍ غير حبك ما أبيه
وكل دربٍ غير دربك ما أبيه
وكل طيرٍ ما شدا بإسمك كذوب !
وكل شاعر ما قِصَد لجلك لعوب !
وكل فجرٍ ما أشرق برسمك شُحوب !
وكل عينٍ ما قرَت حسنك ضريرة ..
سـيـرتِك أغلى كتاب
وفي يِدِي الطبعة الأخيرة .
( 10 )
صورتك في كل صبحٍ لي جريدة
وهْجها أسرار وأشعار ونشيدة
ورحلةٍ فوق السحاب
وباقة ورودٍ جديدة !
يا ملاكٍ جاوز إدراك البشر ..
من عطى اللحن الوتر ؟!
من سقى الضي القمر ؟!
ومن ملا وحشة حياتي
وعطّر أنفاس الزهر ؟!
من نِثر فيني فصوله
ولـّمني بين الطفوله والرجوله..
غير طيفك.. لا دنَت لحظة وصوله
بالمواعيد الأخيرة ؟!
( 11 )
ما عرفت إني لِك إنتي قبل أعرْفِك
ما بقت فيني ( خليّة ) ما تعرْفِك
إبتهاجاتي تعرفِك
إنكساراتي وذاتي
وإتجاهاتي تعرفِك !
ساعتي ، عطري ، مفاتيحي
وحاجاتي تعرفك ؟!
وكل من كان وعرفت ..
وصار يعرفني يعرْفك
ومن سمع عني قصيدة.. لو قصيره
ومن سمع أول قصيدة ..
ومن سمع هذي الأخيره .
( 12 )
طال عمرك ، أو قِصَر ما همّني ..
ما دمت أنا عُمرك
وما دمت أنا أمرك
وما دام كلي لك زَمان
وما دام قلبي لك مكان
وما دام شعري جلستك .. ودْلالِك وتمرِك.
وما دمتي في عرشي الأميرة
كل عام وأنتي بخير ..
وكل عام وأنتي الأخيرة.
الــريـاض
1994