( عـالـمـك )

( 1 )

عالمك ..

لعبه غبية ، زيف وإستغراب .

وعالم مرتاب .

وعالمك طفل وصخب وألعاب .. وسط ألعاب !

وغارق بتراب  ..

وأنا البعيد بعالمي  ..

أنا الفريد المنتمي للكوكب إللي غاب

وأنا الوحيد الأجنبي في عالمك ..

وباقي البشر في عالمك ، مثل التراب قراب .

ولا يفلح الكذاب

وما يصلح الكذاب

ويا خيبة الكذاب .

وعالمك بالمختصر ( ولا تزعلي )

كذاب …

 

( 2 )

إنتي ضحية لهالقرف ..

إللي يسميه الغبي أو فاقد النعمة ترف !! .

وما هو ترف هذا الفراغ إللي سكن عقلك ..

وعبا هالغرف .

وما هو ترف هذا الضياع إللي عن النور إنحرف

وما هو ترف هذا الصراع إللي يدور ولا وقف

وما هو ترف هذا التوجد للعلف ؟؟

هذا قرف  !!

 

( 3 )

إنتي ضحية مجتمع

أو، لا ..

إنتي ضحية من طمع ..

أو، لا ..

إنتي ضحية هالصدف .

الله يسعد لي الصدف ..

شفتك بعين إحساسها ..

شفتك وكل شي إنكشف .

 

( 4 )

حياتك إستعراض .

ما بين زحمة من ورق ..

وكومة من الأنقاض !

وحياتي آخر ما بقى

من هالمدى الأزرق ومن ذاك البياض .

ولا لي على العقل إعتراض

ولا لي على الجهل إعتراض

ولا لي على الضعف إعتراض .

ولو يكون الصبر عدّا

وكل ما بالصدر فاض .

 

 

جـــــدة

1999