( الطموح دروب )

( 1 )

 

الطموح دروب  ..

وإنت دروبك  العشق ، وطموحك أم عذرا !

وليلة سمرا وقمرا ..

ونار تشبه مبسم المحبوب حمرا ..

ومستراح قلوب ! .

 

( 2 )

آه … الرعبوب

ياالشارد بعيد بعيد وينك .. ؟

وين ريحة ياسمينك ..

وين لفتات الهروب ؟!

وين  يالمحبوب عينك ..؟

آه ياعينك ..

كذوب إن قلت لك ..

لا شفت عينك ، ما أشتعل وأضوي وآذوب ! .

وآه يا عينك ..

تراي أكذب عليك إن قلت لك ..

إني بريء من الطفولة ، أو قليل ذنوب !

وأكذب لو إني قلت أعيش بلا حلا .. !

أنا بلاي بهالحلا ..

ومبلي بلا

في موج نظراتك وبحرك والمدى والصوب ..

ولو تبت عن كل الخطايا في حياتي ..

ما أظن إني عن الإبحار بعيونك باتوب !!

 

(3)

ياللي ولا مثلك أحد

مخلوق لي إنت الجسد

ومخلوق أنا لك ثوب !!

قم وإلبس إحساسي

وغطي البرد بأنفاسي

وسولف لي .. عن أخبار المشاعر و القلوب .

قم يا رقيق العود ..

ياالمبرود من سلك الحرير

ومن أصيل المستكا والعنبر المسكوب .

خل الجنوب شمال ..

وخلي الشمال جنوب .

وخل الغروب شروق ..

وخل الشروق غروب .

ولا ترحم المنهوب .

 

جـــدة

1999