( غلابة )

( 1 )

 

في صباح يشبهك .. !

صليت . طوّلت السجود

وطاحت بقلبي مهابه .

قلت :  يارب السحابه ..

يابصير مايخيب اللي تذلل عند بابك  والتجابه  .

يانصير ، إمطر على الظامي رضاك ..

ورد للغاوي صوابه .

وردنا لك يا مجيب اللي توسل بك ، على  دين الصحابه

الناس في غفله ..

وأنامسلوب من صوتي ..

وعلى  هالقلب .. ياربي جنابه

وشلون يسمعني الهدير .. !

وفي و سط موج الضمير انا وصمتي  .. !؟

ولا معي غير الربابه .!!

وشلون أقول : ان ابن آدم لوفقد ربه حقير ..

ولا يصير .. ولو ذبابه !!

وشلون أقول : إن الغرور قبور ..

وإنّه ساحل مهجور ، حتى من ترابه ؟!

الناس ياربي طغت / تجبرت / تكبرت ..

والناس صارت في زحام –

أصنام وأغنام وذيابه .

والناس ياربي .. مثل حالي  مساكين و( غلابه )

 

( 2 )

فيك ربّك ..

وفيك نفخة روح ربك .

لا تصافح نجس ..

ولا يصير الرجس دربك .. خاف ربك .

الأمانه روح  والروح الأمانه ..

ردها للي يحبك !

ردها للواهب اللي ماحرمك من العقل ..

رد العقل وإعقل

وداريها بقلبك !

واترك الكل لترابه .

 

جـــدة

1999