( 1 )
قلت للتاريخ سجل ..
قال .. سجل !!
وش اسجل ؟!
طز فيكم ؟؟! .
يا عديمين الكرامه
يا قلامة من أظافر عنتره
يا قمامة سالفيكم ؟!
وش أسجل .. ؟؟ هالمبادي ؟!
وإنتم إللي بألف مبدا ..
كلمتين تبيعكم ..وكذبتين تشتريكم .
وش أسجّل هالقيّم ..
وإنتم إللي سالخين جلودكم ..
ولا بسين الذل .. عن بكرة أبيكم ؟
وش أسجل يا الخبل ..
والله عيب إن البياض إللي تسطر قبلكم ..
يسخط عليكم .. !!
يا ولد ما جيت أسجل ..
جيت أغطّي سوأة التاريخ
وأدفن ما مضى من مجد أهاليكم .. وأعزيكم !!
( 2 )
يسخر التاريخ ..
والتاريخ ما ينلام ..لو سب وشتم نيّام .
والله إن الحبر يخجل من سوايا الذعر فينا ..
وتستحي الأقلام ! .
ويالله إنك تجبر كسور الضعوف إللي خذلناهم
على مسمع ومرأى العالمين ..
وترحم الأيتام !! .
وياالله إنك ما تعزّ إلا معزينك ..
ولا عز بدونك يالعزيز
وتنصر الإسلام .
والله أنا ضايعين وتايهين بها الزحام ..
فاشلين بكل شي ، وشاطرين بها السوالف والكلام
غافلين .. وكننا بين الأمم .. كومة بهم ، وعلامة إستفهام ؟
والله أنّا لو تكاتفنا .. نسفنا معبد الترهيب والأوهام !
والله أن لو تدارسنا ، وكرسنا ..
دعسنا شرذمة صهيون بالأقدام
والله أن لو ولو
وألف لوْ تلفنا وسط الأغاني الهاربة .. في حانة الأنغام !
ياسلاااااااااااام
الريـــاض
2001