(وإنتي بعيد)

(1)

وإنتي بِعيد ..

أبيد في هَـمّي أبيد

أشكي منَ الوَقتِ العَنيد

وأجلِس وِحيد ..

أرقُب تَباشيرِ الـمِطَر

أناظِر أوراقَ الزَهَر

وأعِدَها

وتِذبَل .. ويِذبِلنَي السَهَر ..

يا هاجِسَ الماضي الـحَبيب

أرجوك تكفيَ لا تِغيب

إنت عَزايّ .. خَلك مَعايّ

وإخِطيّ عَلى دقّة خُطاي

سَلوَه يِناجيها الغَريب

إللي أعذرَتَ فيه السَنّين

إللي يِعيش آه وحَنين

وإنتي بعيد ..

(2)

مالي بـَها الدِنيا أحَد ..

مالي أحَد ..

أعيش لـَه .. ويِعيش لي غَيرك أبَد .

يا غايَة أسفاري وعنايّ

يا سر أسراري وهَنايّ

صابر أنا ..

صابر عَسايّ

أسعدَ بَعَد هذا الشِقا

وابدَا مَعِك عُمرٍ جِديد

وإنتي بِعيد ..