( 1 )
من بنات النار
جمراتٍ حمر ، ما بينهن والعشق والغيرة نسب !
عاشقات .. وعاطفيات اللهب !
في طبعهن سجيت ..!
سجيت وش لاقيت ؟؟ دوّار وتعب ..
وعيون غرقانه سحب .. !
تبكي علي إن غبت ، وإن طليت !
( يا قيس ) :كل أنثى على وجه الثرى ( ليلى )
ولا ( ليلى ) شبه ( ليلى ) أبد يا قيس !
وإن قلت: ( يا ليلى )! متى وقت السفر .. يحلى؟!
تقول إن صارت الرحله غزل ( يا قيس ) !
العاشقات كثار .. والدنيا مواكب من وداع .. ومن صخب زوّار
ومهما سمعت أخبار ، لا تنذهل يا( قيس ) !
العالم الواسع ثلاث ..
أنثى ، ذكر ، وإبليس . !!
( 2 )
لي صحبة.. من باذخات الطيب ..
حلوات المنادم .. لا حكن .. يتشقق المنطوق !
جن وإسكنني غصب .. يا ضعفي ..
ويا ويل بن آدم .. لا غلبه الشوق !
فيهن كتبت آخر سواليف الطرب ..
ومنهن تعلمت الشغب ..
ومعهن لعبت طروق .
ياويلهن ..
مايرحمن حتى الضعيف المعتكف بآخر زوايا السوق !
سدن على قلبي دروب من الهوى ..
وسدن مغاليق الهوى .. وسدن عروق .
الله يعلم وش تواليها معاهن ..
وش وراهن ..
تايهات وتوهني بالبها والذوق .
الريـــاض
2000