( 1 )
من بني غسان..
من شهد العَرَب
من شهقة الإغريق
من عَمان!
عفرا، تدلّت بالحَشا
لاهي رَشا
ولا تشبه الغزلان !!
ما لوّح القيظ بسماها
ولا وطت بيدا..
ولا غِفْيَت بدون ألحان !
أنشودةٍ في طعمها ذاب الحِـزِن
وترهبن العشق بلماها..
وإستوى الرمان.!
وضحى مدن ..
كأنها بجنة عَـدِن
حوريةٍ من حور شاعر ..
ما تخصّ إنسان . !
كيفي، وعلى كيفي أهيم بسحرها
وآموت وأحيا ..
وأذكر الرحمن .
( 2 )
والذي هزّ السحايب، وأنفرد بالريح
والذي خاوى وساوى بين …….
إنِك أحلى ما يكون
وإنِك أغلى ما يكون
وإنِك أهداب العيون
وخفقة القلب الجريح .
مو صحيح..؟
أسألك بالله قولي : مو صحيح ؟!
ما تحسين بدفا شوقي ، وأنا أشوفك _
وأنا أسمع همسك العذب المريح ؟
ما تحسين بجنون الطفل فيني .. وهو يصيح ؟
أعشقك يا بنت _
أحبك ..
آه يا حبك ، قطفني من غصوني قبل أطيح !!
أعشقك ..
ما قلتها ، إلا وأنا مصلوب بإحساسي على بابك ..
ومسلوب وذبيح ؟!
أعشقك: ما هي حروف..
إلا سيوفٍ أنتصر فيها على الوقت الشحيح !
أعشقك..
ما قلتها إلا على شان أستريح .
وإغفري لي .. لو خذلني البوح ..
أو خان اللسان .
كل عشقٍ غير عشقك فوق وجه الأرض فان .. !
إلبسي تاج الحسان ، وظلليني
وإحكميني ، ولوّحي بالصولجان
إنتي أجمل من ملكني.. من مليكات الزمان !! .
( 3 )
قبلك الآلاف النجوم أحرقتها !!
لكن ، على يدّك طفيت، ولا حرقت !
وقبلك الآلاف النجوم أغرقتها !!
في البحر ، لكن ما هويت ولا غرقت !
إنتي وبس إللي بهرني حضورها
وإنتي وبس إللي حضنّي سورها
وعندك نسيت الموجعات ..
والماضيات إللي قهرني جورها .
يا اللي نشلتي الروح من ديجورها:
ماغاب .. من غاب وتغرّب في عيونك
دهشة المنفى عيونك ..
وبهجة المنفى عيونك والختام
آه يا مسك الختام :
وش أبي غير السلام إللي بعيونك ، والسلام .. ؟!
نامت الهيجا، وسيفي كـَلْ، والساعد خذلني ..
والأماني صحصحت ، والوقت مَلْ ..
وأقرب أحبابي قتلني .. !!
والسهر لعنة، وأنا من ألف عام
في زحام الهم ، وحْبوس الظلام .
أرسمك وأفني شبابي
وأحلم بساعة غرام ؟!
لا تصحيني دخيلك
لا تصحيني دخيلك ..
أتركي عيني تنام .
عـمـــان .. نوفمبر
2001