(قبل أكون)

لا صِرت لي كِلَ العُمُر .

ما هو غَريب إني أموت وأحيا شِعِر .

وأسبَح عَلى صوت السَهَر مِثل العِطِر ..

وأفيض دَمعَه مِن فَرَح ..

تِنعِش نسانيسَ الفَجِر .

يا مِلهي مِن قبَلَ أكون ..

لـَجلَك .. تِـحديتَ الـجِنون

والعِشق وإللي يعشَقون

والشِعِر وإللي يِشعرون

ومِن شوفِتي لعينَك .. صَرَخت ..

يالعِنبو كِلَ العيون .

يِفداك كَلَ إللي كِتَبت ..

مِنَ الـخَواطِر والظِنون .

ويَفداك كِلِ إللي عَرَفت ..

مِنَ الوِصايِف والفِتون ..

إن جيتَ أبا أرسِم صورتَك

في الشِعر حَرفي لي يخون .

وإن جيت أطالِع بَسمِتَك ..

الشَمس في شوفي تِـهون .