( 1 )
كيف اختصر فوضى الانوثه فيك ؟!
كيف أعبرك وشلون أعديك ؟!
ياهيه يامدلل
تمهل ..
حس بي وشفيك ؟
ماتشوفني حولك أطير وأشتعل ..
من غيرتي وأطفيك ؟
ماتشوف كيف أتفجرّك وأتصبرّك
وأتصوّرك وألغيك ؟
ياهيه .. كيف أرضيك ؟؟
وانت ان زعلت أشقيتني ..
بالظن والتشكيك ؟!
وإن طاب خاطر حضرتك ..
ذليتني ..
في كثرة تْغليك ؟!
ياهيه ربي يحفظك ويصونك ويهديك ! .
والله يعين اللي يبيك .
( 2 )
خلك من التطنيش
عيش بصحبتي أو لا تعيش !
واتصور إني ألمحك واساهرك وأصبحك
وأطير لك في كل يوم بلا رياح وريش !
واتخيل إني أسمعك واستمتعك وأمشي معك ..
وآتابعك وقت الدلع وآطيش !
ياخانق عروقي بكف العشق
ياليت يبحر بك شراع العشق
وتخفض جناح الطيش .!!
انت اللي تحسه مو هوى ..
وين الهوى عنّك كأنك ماهويت ..
أو ما شكيت من الجفا والعذل والتشويش ؟!
وين الهوى عنك كأنك مو كأنك !! ..
ما كأن اللي جمعنا ملح ولاّ عيش ؟! .
الحب أنا وحدي .. وغيري
حقه التهميش ؟
ومادمت لي كلك .. وكلي لك .. أبحكي لك :
أنا أناني بورد بستاني ، ولا ودي ف بستاني شريك
ومحتار كيف أرويك
وكيف أقضي على ماضيك ؟؟
وكيف أختصر فوضى الأنوثه فيك
وكيف أعبرك وشلون أعديك
ياهيه .. يامدلل
تمهّل ..
حس بي .. وشفيك ؟ .
ياهيه ربي يحفظك ويصونك ويهديك ..
والله يعين إللي يبيك .
( 3 )
قبلي تراك أتعبت خلق الله .. !
واليوم متعبني معاك .. ولاهي بخلق الله ؟!
ياهَم خلق الله ..
وياشغل خلق الله ..
ويا أعذب احساس تورّد بين خلق الله ..
أموت بك والله ..
والله عليك الله ..
يالفاتن المجدول
مابين صمت وقول
وياآحب خلق الله .
الناس من طين ، وعجينك من ذهب والله !؟
وانفاسك من الياسمين ..
وبحر عينك من ظما
والزول بإسم الله !
ارفق بعبدالله ..
ارفق تراي أضعف بشر لا شفت صنع الله . !!
وإرفق ترى مالي طبيب .. إلا انت بعد الله .
ياللي من سهومك أوّن ..
ومن صخب يومك أجن .. وشكوتي لله .
شاريك وملهوف عليك ..
وليت بيدي .. لوأسجنك ثم اقتلك وأحييك !!
وأتعلم شلون أشربك وآغيّبك وأخفيك
وكيف أختصر فوضى الأنوثه فيك
وكيف أعبرك وشلون أعدّيك ..
ياهيه .. يامدلل ..
تمهّل ..
حس بي وش فيك ؟؟
ياهيه ربي يحفظك ويصونك ويهديك ..
والله يعين إللي يبيك .!!