( صباح الخير .. ؟ )

(1)

صباح الخير .. واتلفت ..

يمين جدار .. ويسار جدار ..

وقدامي صحف أخبــــــــــار ..

وعلى يدي بقايا حبر …

وفي الدفتر طشاش أفكار ..

هلا يا صاحبي اللي طل عصرية …

هلا بك يا هلا وميه ..

عطوني التمر والدلـــّـــــه ..

وهاتوا قربة الميـّـــه ..

ظميت اليوم فجرية .

وكنت أحلم ..

وفي الأحلام حريــــــة .

(2)

الو يا مرحبا بها الصوت ..

أنا يا سيدي محتاج إنصات وزمان وسكوت ..

ترى التفكير فيه أشتات وصدري ضايق مكبوت ..

الو.. يا مرحبا بالجار .

أنا يا صاحبي مهموم لا تنشد وش اللي صار ..

عليك الله تعذريني وهذا أخر الأعذار ..

الو يا مرحبا بالعم ..

أنا يا عم ما نمت السهر في ناظري خيم ..

أبيك اليوم تسمحلي وعقب أسبوع نتكلم .

الو يا مرحبا حُبي ..

وراك أبطيت ما دقيت صار الخوف يلعب بي

ذبحني الشوق لعيونك متى الميعاد يا قلبي ..

بحوري يا الربع جفت ..

صباح الخير .. واتلفت ..

يمين جدار .. يسار جدار ..

وقدامي صحف أخبار ..

وعلى يدي بقايا حبر ..

وعلى الدفتر معاني كثار .