شمس الشموس من اوبريت مملكتنا العز
كلمات صالح الشادي
الحان سهم
غناء راشد الفارس ونواف الجبرتي
اليوم الوطني السعودي ٩٦
( شمس الشموس )
هي كذا من يومها شمس الشموس
هي سما للعز. وارض ٍ للفخر .
ما حنت نخلاتها حربٍ ضروس
ولا كسر وجدانها جوع وفقر .
إيه عانت من جفاف ومن يبوس
ايه شافت ضيم واجحاف وكدر .
لكن الله اختارها تكون العروس
واطهر اطهر ارض يسكنها البشر .
مملكتنا ياغلا كل النفوس
ياهوى الأرواح ياضي النظر .
كل شبرٍ فيك محمي ومْحَروس
من هبوط آدم الى يوم الحشر .
اختيار الله ولا فيها هجوس
وقبلة اللي حج بيته واعتمر .
وموطن الامجاد من قبل “البسوس”
والملاك اللي على الدنيا ظهر .
يوم ” أبو تركي” ظفر بالعيطموس
كان هو يوم المنى وأجمل قدر .
العظيم اللي عطى العالم دروس
والحكيم اللي حكى عنه الدهر .
حنكته خلت عدو الله يحوس
وحكمته من لطفها لان الصخر .
أرسله ربي وداس الذل دوس
وجمّع قلوب البوادي والحضر .
وحّد وجدد وطن وأنهى عبوس
وعاهد إنه ينصر الله وانتصر .
مملكتنا العز والعز مْغروس
و”عزنا في طبعنا” طول العمر