( 1 )
الشيب
هذا الضيف الأغبر زارني
والضيف له حقه
وله تقدير
وأنا على ما شفتني يا طير ..
مثلك أفـّز من الصدى
وأحتاج مثلك للمدى ، للبوح ، للتعبير .
خذني .. أنا المخنوق أبتنـّفس
خذني مدام إن المسا عسعس
والدار صارت غير .
( 2 )
يا طير يا رفراف
خذني ورا الأطراف
خذني وأنا المسؤول عني.. لا تخاف!!
الحزن من ربعي ..
وعشقي من عرفته ما تغيـّر
للصبايا وللرغيف الحاف
خذني وأبحكي بصمت..
للشيح .. للقيصوم .. للعزاف
عن قصة غياب المطر
وعن طعم هالدنيا بدون إنصاف .
يا طير .. خذها من قصير
أبا أقبل التقصير لكن_
ضيف راسي لا يهون ، أو يلحقة تعكير !
( 3 )
الشيب
من جيت أنزعه
قالوا، مردّك للبياض
وكل شعره بأربعه!
قلت أرفعه ..
قالوا كِثر جهلك ، ولا لك إعتراض
و الحقيقة .. موجعة
آه يا هي موجعه ، إنك تطول الشمس
والبرد يسري بك !
آه يا هي موجعه ، إنك تشوف مرايتك
تفرح بتعذيبك؟!
يا إنت يا طيـبك
أشغلت نفسك في يـباب من البشر
غابوا ودوّرت العذر لغيابهم
وفي غيـبتك .. ما دوروا إلا عذاريبك !
تعوّذ من إبليس ، من هالناس، من طيـبك!
يا إنت يا طيـبك
لو لاح لك وجهٍ من الماضي تشجع وأصفعه
أو إمنعه
ما ينفعك مثله غبي.. ولا تنفعه
والشيب لو زارك ، وقارك فيه
حيـيه ثم حيـيه ثم حيـيه
ولا تقلعه
الشيب مثل أحلى القصايد
روعته في مطلَعه
( 4 )
طفله ، وطاحت من زحام
قالت سلام
قلت السلام .. نامي وخليني أنام
من بعد نوّار العمر
وش فايدة كثر الكلام
قالت سواليفك عسل ..
زدني غزل
ومن يطلب الجنه من أمثالك وصل
يا شاعري
قم وإسقني نخب الغرام؟
قلت السلام.. نامي وخليني أنام
قالت : ولا قل الغلا..
أبيك أنا وإن قلت : لا
ولك ما تبيه من الهَلا ومن الولا ومن الحلا
ولا لي بديلك في الملا ،
ولا لي مقام
قلت الهوى ، عند الخفوق إليا إستوى
جهل وحرام
والشيبتين .. آخر مشاوير الصبا
وأول مشاوير الصيام
ولا على شايب ملام!
قالت سلام
قلت السلام
ويا لله عسى حسن الختام
عــمــان – 2000