( العــنـب عـنْقـد )

( 1 )

العنب عنْقد ..

وذلوك الصَبَايا الآنِسات .. وروعوك الغيد .!!

وإنت يا قلبي عنيد

كـِل ما غَرّد على بالك هوى ..

طحت بهوى ..

ورديت عاشق من جديد!

( 2 )

آه يا طعم الهوى ، بعيون رعْبوبٍ لعوب .

ثم آه يا شمعة تذوب وتنطفي

وترجع على كيفي تذوب.

ثم آه يا سحرٍ صدح في ثغرها

ويا نَحْرها ..

ويا شَعْرها المسكوب ..!!

أتوب .. لا ما آتوب لكن ..

للشموس غروب ..؟!

والعين يا قلبي بحر ..

يعني سفر ودروب .

وأنا قضى فيني الصبر

وما عاد أطيق هروب .. !!

وآكيد ..

آمنت  بالحل المناسب  والوحيد ..

أكيد .. لكن مو أكيد !!

بس إنت يا قلبي عنيد..

كل ما غرد على بالك هوى

طحت بهوى.

ورديت عاشق من جديد !

( 3 )

( جولييت ) ضاعت من زمان ..

زمان ضيّعها الزمن .

وإللي وفَن ، أحيان ما حبِنْ هبوب الريح ..

وأحيان إستحن !!

والعاشقين مبعثرين

بين المنافي والوطن .

وإللي سكن بالروح راح ..

ولا حبيب ولا سكن ؟!

والظن عذروب ا لشعور..

وغيرة الحور( الكفن ).

ومابه سعيد إلا البعيد ..

ولا مزيد إلا الحزن ..

والآه  والتنهيد ..!!

بس إنت يا قلبي عنيد ..

كل ما غرد على بالك هوى ..

طحت بهوى !!

ورديت عاشق من جديد .

 

البحـــر المـيّت

         2000