( 1 )
إستقاله!!
ماله إلا الإستقاله..
طالما العالم جفاه
ولا وجود ولا أصدقا له .
الهنا ولىّ لغيره .. والشقاله.
وكل سفحٍ ما لقى إلا الخوف عنده..
من رقى له ..!
والحياة إللي وراه إللي معاه إللي قباله..
وش تكون .. إلا حكاية برتقالة.
ماتت بكف الزمان..
فدوةٍ لك يا الغزاله.. !؟
( 2 )
ما أَبَي ثوبٍ قصر عني وقصّر من كبرت ..
ما أبي كوبٍ ظمي لغيري ، وظميته وإنكسرت
ولا أبي هروب كذوب يقول : مبروك إنتصرت..!
ليتني قصّرت..!!
ليتني قبل الشتا ، جبت الشتا وأمطرت..
ليتني قبل البكا قبــل الدموع أبحرت
ليتني قبل الفضا والريح والجنحان طرت.
أوحفرت القبر بيدي..
وقمت أسيل بنـزفي الصادق قباله
من عناي ومن وريدي
لين يغمرني قصيدي
أو يريحني التلاشي..
أو يغيبني ظلاله .. في ممات .
وكل موت يموتني..
فدوة لك يا الغزالة
( 3 )
السكوت أدفا كثير من الدفا وأبرد كثير..!
وإنتحاله.. ضرني ما سرني
وقلبي عفى .. وكان الكبير ؟!
وش تقولي .. لا تقولي .. قالت العالم: غرير!!
إقبليني مثل ما التفاح يقبل كل كفٍ تحضنه..!
وقابليني مثل ما الغربة تغيب بعين من رد وْطنه..
وإزهميني دندنه .. أو إحضنيني سلطنه..!
ثم إشغليني بالحساب .. وبالعلوم..
وبالهدوء .. والشيطنة؟!
تحت أمرك يا سمو الحب .. آمر..
الحياة المستحيلة لو تبيها ممكنة.
وجهك أنتي ..من يصبح في مساه..
ومن يمسي في جماله.
لو يكون إللي بقى له
يوم من عمره ،يبيعه..
فدوةٍ لك يا الغزاله!
( 4 )
يا جناب العشق جيتك..
ما معي لك غير أنا ..!
إختر إللي تهتويه .. إما أنا وإلاّ أنا !
يا ضرامٍ يشتعل فينا .. ويطفينا هَنا .
ويا كلامٍ في شفايانا فنانا ولا فنى..!
ويا سلامٍ داعب المجني عليه ومن جنى ..!
في سبيلك .. لو لقيت إللي لقيته .. ما تصدق
الحكي يا مَكْثره .. خِذ ما تبيه ولا تدقق !!
أدري إنك صعب تفهمني .. ولكن ..
حاول إنك يوم ترفق .!!
دامني فيك مْتوله للثماله..
مثل من ضيع يمينه من شماله ..
يوم خط الإستقاله..
فدوه لك .. يا جناب العشق .. مّرة..
وألف مرة للغزاله؟؟
جــــــــــده – 1993