( 1 )
المودة في إحتضار ..
إلحقيها لا تموت، وينطفي هذا النهار !
المودة في إحتضار ..
لا يفوت الفوت .
بيدك، تقلبي الصحرا خضار !
والمودة ما تكون إلا بعقل يسوى ..
وبأحاسيس تغار ولا تغار ؟
والمودة لو فقدناها .. فقدنا كل شي ..
كل شي .. حتى البراءة في الصغار !
والمودة ، إنك تكوني سما ..
وأكون أنا قصة ظما ، في موسم الأمطار .
أو بإختصار ..
في وسط كل الهزايم حولنا ..
المودة إنتصار..
جامليني ..
وشاركيني طعم هذا الإنتصار !! .
( 2 )
إنسان جيت أستوقد إحساسي بتوصيفك !
حرمان ، مكتوب عليه يصير هو ضيفك !
وجعان ، صرتي له دوا ..
ومنه أرتوى سيفك !
يا بنت غني له قصيدة آه ..
قصيدة ليتني ويّاه ..
هذا الإندهاش إللي يساره أشغلت يمناه ..
أو غني على كيفك !
يا بنت وش يمنع غرورك لا يبيع العرش ساعة ..
ويْتخلى عن قِناعة ..
القَناعة كنـز ..
ومن هالكنز قولي وش يخيفك !
يا بنت أنا وإنتي بشر .. آدم أبونا وأمنا حوا ..
وهذا الطيف طيفك
أقبلك بالوجه الأول ما أقبل الثاني ولا الثالث ..
ولا أقبل منك زيفك.
لا تقنعيني بها الغبا ما إنتي غبية!
ولا تشغليني بالظبا وإنتي شهيه!
ولا توهميني بالعطا يالنرجسية!
إصدقيني ..
أو على الله .. لا تزيديني شرار !!
المودة في إحتضار .
الريـــاض
1998