أقسم برب العراق..

أقسم برب العراق..

إني تعبت..

وهدني الإرهاق.

ما صدق حولي ولا مخلوق يا صاحب..!

ولا صاحب سِلم..

من عضة أنياب النفاق ؟!

الشرق الأوسط وين..؟!

حنا الشرق الأطرف..

والمهانة.. والشقاق !

الأرض تتشقق وجع..

والكل يغرسها سكاكين وسيوف..

وشوف طعنات الأسى..

واسمع مناحات الفراق !

محدٍ على برّه رسى..

ولاحدٍ من الموج استفاق.

يارب : وش تالي التعب ؟

وش آخرة هذي الدروب الموحلة..

وهذا السباق ؟!

هدني الإرهاق.

(2)

محموم أنا هاليوم..

مريض ..

فيني برد قاسي.. لا تزوريني.!

مهموم..

ما آبيها عيونك..  تلمح الأوجاع في عيني.

مهزوم.. يا عيني.

مكسور لآخر ما يكون الذل..

يكفي ذل.. يكفي لا تذليني !

وشلون أعيشك..!

والتلاشي عايشٍ فيني..

سنين طوال..

منهيني ، ولاغيني.

وشلون أذوقك..؟

والمرار معلقمٍ من شدته..

باقصى شراييني.

تكفين فكيني من أي عناق..

أنثاي..

خلي الاشتياق..

حنا بزمن جفوة ..

ماحنا بزمن عشاق.

 

هدني الإرهاق .

(3)

لومي على كيفك..

كثير اللي يلوموني، مسا وإصباح.

 

كذا..أنا مرتاح مع جرحي..

ولاودي بزود جراح !

 

إدعي معي..

قولي: عسى الله يلطف بحال العنب..

والتوت والتفاح.

قولي: عسى الدنيا تصير بلا غضب..

وبلا كذب..وبلا سلاح.

 

قولي: عسى البسمة ترد..

قولي: عسى الكلمة ترد..

قولي عسى أحدٍ بها لعتمة يرد، ويشعل المصباح !

 

ماعادفينا مبصرين..

ولىّ زمان الراشدين..

ولا لاح فجر الصابرين، أهل السماح.

 

أستسمحك:

روحي.. أنا ماعاد لي رجلٍ وساق..!

 

أستسمحك.. حلي الوثاق.

أقسم برب العراق..

إني تعبت،

وهدني الإرهاق.

 

2005