( وجه المدينة )

( 1 )

 

لو كشفت الليل عن وجه المدينة

ما تشوف إلا بقايانا الحزينة .

العزا ، وغير العزا ما به سوالف ..

والشقا كنه مع الروح متحالف..

ما يخالف .. ما يخالف !!

جف يا دمع المشاعر يالمشاعر

ما بقى سطر يتحمل همّ شاعر ..

ولو يقول إنه سعيد

ولو يكابر..

تالي القصة دموع وغصّه … وكومة حساير !!

 

( 2 )

البيوت الصامته

زحمة وجع وجراح

ومابه المرتاح …!

لا تصدق وشوشة ريح الشمال ..

ورعشة المصباح!

ولا تظن إن الجفاف إللي يحوف أسوارنا ..

من سيرة التفاح!

الكآبه ألف غابه..

تحتمل مليون معنى ..

من حلال.. ومن ذيابه!!

والسحابه لو تهل .. الموت وارد..

والظما.. كفه ونابه.

والنهايات الصباح!!.

لملم أحلامك ودور كفن يا صاح!.

 

( 3 )

يالوسايد ..

يا أمان الهاربين من الشدايد…!

أحضني لوعتنا وعبراتنا ولا تتركينا..

ويا ظلام ، أستر علينا..

واحتوينا..

انفرطنا.. ويرحم الله القلايد !.

من يبشرنا من جديد ..

ومن يفرحنا بعيد..

ومن يعايد!!

يا زمان عربدت فيه الأماني ..

ويا أغاني ما بها طعم الأغاني ..

ويا ثواني من قهر..

يا مرمره…

يا سخط..

يا عالم أناني !!

اختفت كل المواني، وانتهى عمر السفينة..

ولو كشفت الليل عن وجه المدينة ..

وش تشوف..؟

ما تشوف إلا بقايانا الحزينة .

 

عمـــان

2001