( 1 )
موصبية ..
مو مثل كل البنات مغندرة بالميك أب وبالحيا !
مو بنية ..
مو مثل باقي العذارى .. بنت ، لكن من ضيا !
فيها طهارة هالزمن كله وصدق الأنبيا .. وفيني بلا ! .
ماهو بلا !
فيني غلا عجزت أشيله من كثر ماهو كبير ..
فيني أعاصير و سيول من الولا
وفيها غدير من الحلا .
يا صاحبي ..
ثقيل ما خفّيت أنا .. لكن بها العشقه خفيف
خفيف ، وإن هب الهوى ياصاحبي :
تسمع سواليفي رفيف .
وإذا الهوى ماهب .. تسمعني بصيـره توصف الشمس لكفيف .
يعني على راي الشعر ..
أنا أنكسر لاشفت رعشه بالسراج ..
وأنا ولد راعي مزاج .
يا صاحبي…
إنس القضية .
وغيّر الموضوع .. ريحني .. ولا تعتب عليه .
أخوك عاشق مستحيل من الصبايا .. مو صبيه !
( 2 )
فيها جهل لكن أحبه وأعشقه وأستطربه
وفيها وجل أستعذبه
في كل شي تخوض خوض ..
ومن كل شي مستغربه !
إليا أقبلَت برق ينوض
وإليا أدبرت متكهربه !
تكتب على لوح السما فوضى كلام
وتقول : حاول تعربه !!
أيامها صد ورضا ود و خصـام
مستسهله مستصعبه !!
تفهم ولكن .. يعني ما تفهم تمام
وإللي صدق تستكذبه
معشوقة عيوني وقلبي والضمير
عن الخلايق غير غير
حلوة .. ولكن متعبه
وما هي غبيه .
يا صاحبي…
إنس القضية .
وغيّر الموضوع .. ريحني .. ولا تعتب عليه .
أخوك عاشق مستحيل من الصبايا .. مو صبيه !
( 3 )
الله
لو شفتها يوم التقينا في مسا شاتي .. وشفت اللي حصل .. الله
جمرة تعربد في جليد وشاعر لحن الغزل بشفاه
يوم الأحد محلاه ..
ويوم الخميس وكل يوم بشوفها محلاه
توي عرفت الفرق بين الموت وما بين الحياه
وتوى عرفت إن الفرح من دونها .. مأساه
وتوى عرفت إن الشعر .. لوما بحور عيونها ما يكتمل معناه .
أنثى على غير إعتياد
تحرق ولا تترك رماد
فيها السواد من البياض
فيها البياض من السواد
لو شفتها يا صاحبي : ما تملك إلا دهشة عذرا وقولة آه .
آه على دنيا بلا فراق وظروف
آه على ليلة لقا وصبح ضرير مايشوف
وآه على سرجوف .. ما ربي خلق في الكون زيه
يا صاحبي ….
إنس القضية .
وغيّر الموضوع .. ريحني .. ولا تعتب عليه .
أخوك عاشق مستحيل من الصبايا .. مو صبيه !
عمــــان
2003