( 1 )
لو سألتي ليه ودعّت الطرب..؟
ليه فارقت الضجيج بلا ضجيج
وليه فضّلت الهرب..؟
ليه صوتي مات في صدري
وذاك المنهل العُذري نضب..؟
ليه جافَني من الجلاس الأجوف..
وليه جافيت الصخب.
ليه ما خنت وضعفت
وليه صكيت الدفاتر وإعتكفت .
ليه بين الحلم والواقع وقفت
وليه خليت الصعب !
وليه نوري عن سما إللي
ما لهم أرض إحتجب..؟
لو سألتي ليه أقول:
أحب.. وإنتي ياللي أحب!!
( 2 )
إكتفيت من العيون الحور
من نفح العطور
من البلابل والسنابل والزهور .
من الرجا والإنتظار
من وحشة العتمة ومن بُعد النهار .
( 3 )
إكتفيت من البكا بليّـا دموع
من التوجّد والخضوع
من الشموع إللي أحرقتني
قبل لا تضوي ضلوع .
من الوجيه إللي تصبّح بالمسا
وإللي تمسّي بالصباح
من التعب ومن الشقا ومن الغضب
ومن الجراح .
إكتفيت: ولا لقيت إلا بك إنتي المستراح
يا هوى يسوى جميع إللي هوى
ويسوى القصيد ومن قراه ومن غوى
ويسوى جديد المحتوى ..
وذاك القديم إللي تولته الرياح .
واللي غرَب .
وإذا سألتي ليه أقول:
هذا شعور إللي يحب !!
الـقـريات
1995