( أحــزان )

( 1 )

البلد

يا كثر ما فيها من أحزان..!

والسهر .. سلوة حيارى

والعذاب إنسان.

إشرقي من وحشة العتمة وكوني

صبح يرتاح بعيوني

وشمس ريانة حنان .

علميني أبجديات الهروب من الغروب

ولحظة الفقدان..!

آه.. يا صُعُب هذا الزمان.

وين أولـّي؟!

ما بقى لي غير وجهك..

جيت ألوذ بنور وجهك

من عبوس أهل الزمان!

جيت أقول إني تعبت من السفر

بين الصور ..

وإني ضِجرت من الضَجـّر

ومعانق الجدران !!

وجيت أقول..

إني هزمني البرْد

وإن الوجْد كايد

والأمل خـّوان .. !

وجيت أقدم لك قصايد ورد..

لكن.. نصفها حزنه يفوح

ونصفها ذبلان ..!!

وجيت أبا أنسى

وصدقيني ما بقى فيني جَـلـَد .

ومحدٍ من الهـّم خالي..

وكل خالي..

ما خلا من هالنكد

والبلد.. يا كثر ما فيها من أحزان.

( 2 )

قصّري صوت المسجل

سكتيه إللي قضى عُمره (يدجّـل) .

ضحكتـك، ياني شغوف لجلجلتها-

جلجليها.. وإتركي الدنيا تجلجل

وإعزمي الفرحة

وخليها تعجّل بالوصول .

الأغاني..

كِـذبة إنسانٍ يعاني

وشي ثاني

لا تظنيها مواني..

ولا تـِعدّيها ولا رُبع الحلول!

والطرب..

إنتي طرب كلّك

دخيلك موّجي ظلك

وقولي كيف أفلـّك ..

وإن جمعتك، علميني وش أقول!؟ .

تلمذيني ..

لعنة الأستاذ من حولي طفت ضوّي..

وتوّي.. بأول فصول التأمل والذهول!!

والخَطَاوِي في حَذَر تنسل بي وسط إندهاشي

والعقل مشلول!!

يا دليل إللي غَدا مِنْه الدليل..

إقهري هالمستحيل

وأنفضي عن كاهلي حمل المسافة

ولا تخليني كذا.. مثل الذليل !!

وكان في قلبك حنان

طالبك.. لا تتركيني

في مهب الحزن وأوجاع الزمان

أغسليني من غثا الأيام بشوَية وفا..

ودورّي لي في ظروفك عن مكان وعن أمان .

غَيبـّيني

في مناخات المشاعر

في تضاريس الجسد.

لو دقايق تحسببيها ، لو ثواني بالعدد .

وبعدها ما أبي أحد غيرك

ولا غيرك أحبه للأبد.

والبلد.. يا كثر ما فيها من أحزان.